Ukrainski forsetin, Volodymyr Zelenskyj, skrivar á boðtænastuni Telegram, at í minsta lagi 19 fólk lótu lív í russiska rakett-og dronuálopinum í nátt.
Forsetin sigur, at russiski herurin enn einaferð er farin at leypa á orkukervið í landinum, nú veturin nærkast.
- Eitt av týdningarmestu málunum hjá russum í nátt var orkukervið hjá okkum, sigur forsetin, sum leggur aftrat, at russar royna at gera tað pínufult og "demonstrativt", sum hann rópar tað.
Tað var longu í gjárkvøldið, at ukrainski forsetin kundi boða frá, at russisk bumbuflogfør nærkaðust ukrainska makinum, og hann heitti á sínar landsmenn um at søkja sær skjól.
