Tveir bilar stoyttu saman í rundkoyringini á kaiini í Havn beint eftir fótbóltsdystin í gjár.

Tá ein stoytkoddi (airbag) varð loystur út, ringdi bilurin sjálvvirkandi til alarmsentralin og boðaði frá óhappinum.

Sambært vaktleiðaranum var bilførarin ørkymlaður og fekk ikki greitt frá, hvat var hent. Eitt annað fólk kom tó til og kundi greiða alarmsentralinum frá, at tveir bilar vóru stoyttir saman.

Tvey fólk vórðu flutt á Landssjúkrahúsið til kanningar. Løgreglan upplýsir ikki nærri um møguligan fólkaskaða.

Fyrr um dagin, um hálvgum fýra tíðina, var eisini eitt ferðsluóhapp í Hvannasundi. Har bremsaði ein bilur, og aftasti bilurin í einari røð við trimum bilum koyrdi í bilin frammanfyri.