Volodymyr Zelenskyj, forseti í Ukraina, kennir seg sviknan av amerikanska forsetanum, Donald Trump.
Tað sigur hann í samrøðu við bretska sjónvarpsvertin Piers Morgan í sendingini »Piers Morgan Uncensored«, sum verður víst á YouTube, skrivar DR við Ritzau sum keldu.
Útsøgnin kemur, eftir at Trump seinastu dagarnar hevur sagt, at Zelenskyj átti at verið skiftur út.
Spurdur, um hann kennir seg sviknan av Trump, svarar ukrainski forsetin:
– Ja, í grundini. Men hetta er meira samansett enn bara mínar kenslur.
Zelenskyj sigur eisini, at tað var pínufult, tá amerikanski forsetin tók støðu fyri hinum partinum í krígnum millum Ukraina og Russland.
