Aftaná eina heldur tunga byrjan upp á kappingarárið við einum sigri og tveimum tapum, so gongur tað væl betri nú hjá landsliðsmálverjanum, Anniku Fríðheim Petersen og liðfeløgum hennara í Gniezno í bestu pólsku hondbóltsdeildini.
Í kvøld vann Gniezno í heimadysti stórsigur 36-21 á Ruch Kalisz. Í steðginum var Gniezno á odda 16-10.
Talan var um triðja sigurin á rað hjá Gniezno, ið er triðfremst í deildini við 12 stigum. Í pólsku hondbóltsdeildini fáa liðini trý stig fyri ein sigur.
Annika stóð væl tann partin av dystinum hon slapp at verja málið hjá Gniezno. Hon bjargaði fimm av níggju málroyndum. Kappingarneytin, Aleksandra Hypka fekk meira spælitíð, men hon bjargaði bara seks av 22 málroyndum.
