Tað eru framstig í arbeiðinum at fáa Patriot-loftverjuskipanir til Ukraina, men tað gongur sera seint.

Tað skrivar ukrainski forsetin, Volodymyr Zelenskyj, á X í kvøld. Har hevur hann deilt brot úr eini samrøðu við eina ukrainska sjónvarpsrás.

– Tað eru framstig viðvíkjandi Patriot-skipanum, men tað gongur sera seint. Seinri enn russisku rakettirnar flúgva, skrivar hann.

Fyrr í vikuni hitti Zelenskyj serligu amerikonsku sendimenninar Steve Witkoff og Jared Kushner í norska høvuðsstaðnum Oslo.

Sambært forsetanum vóru tríggjar avbjóðingar á skránni: trot á loftverju, avmarkingar á hernaðarligu Starlink-skipanini Starshield og avmarkingar á amerikonskum fregnarupplýsingum til Ukraina.

– Eg eri amerikanarunum og okkara toymi takksamur fyri, at tvær av hesum avbjóðingum – fregnarupplýsingar og Starlink/Starshield – eru loystar frá í dag at rokna, skrivar Zelenskyj.

Ukraina brúkar Starlink til samskifti og dronuvirksemi á hermótinum.

Fyrr í oktober boðaði Ukraina frá, at landið ikki fekk amerikanskar fregnarupplýsingar um russisk álop. Men sambært Reuters sigur Zelenskyj nú í samrøðuni, at Ukraina aftur fær upplýsingar um russisk álop við ballistiskum rakettum.

Sambært AFP sigur forsetin eisini, at ein fundur millum Ukraina, USA og Russland skal vera í november.

– Vit eru til reiðar at tosa. Snýr tað seg um landaøki, má tað viðgerast á leiðarastigi, sigur Zelenskyj.

Ritzau