Í dag endaði tað 1-1, tá ið Skála ÍF hevði vitjan av AB.

Í dag endaði tað við málleysum javnleiki, tá ið Víkingur hevði vitjan av EB/Streymi.

Víkingur hevur tryggjað sær rættin til luttøku í Europa næsta summar. Tað syrgdi Víkingur fyri við 2-0 finalusigri ímóti KÍ í kappingini um løgmanssteypið.

Málleysi javnleikurin í Sarpugerði ber við sær, at EB/Streymur hevur 27 stig.

At tað endaði 1-1 undir Mýruhjalla á Skála millum heimliðið og AB ber við sær, at bæði Skála ÍF og AB hava 25 stig. Hetta er sama úrtøka, sum 07 Vestur hevur.

Tað er greitt, at B68 er flutt niður í næstbestu deildina. Og nú er tað greitt, at hin niðurflytarin verður eitt av hesum fýra – EB/Streymur, Skála ÍF, AB ella 07 Vestur.

Í síðsta umfari hittast EB/Streymur og Skála ÍF við Margáir, og AB og 07 Vestur hittast inni í Vika á Argjum. Tað er møguleiki fyri, at málmunurin fer at gera av, hvat av hesum fýra liðunum fer at flyta niður. EB/Streymur hevur 27 stig og málmunin -12. Hini trý liðini hava 25 stig. Málmunurin hjá Skála ÍF er -13. Málmunurin hjá AB er -14, og málmunurin hjá 07 Vestur er -17.

Felags fyri øll tey fýra, sum leygardagin fara at stríðast fyri lívinum í bestu deildini, er, at tað er upp til tey sjálvi at gera av, um tey skulu bjarga lívinum í bestu deildini