Nú er tað greitt, at B68 í 2027 ikki verður partur av bestu deildini. Í dag tapti B68 2-1 á útivølli ímóti 07 Vestur. Undan síðsta umfari, tá ið B68 fær vitjan av FM vinnarunum í NSÍ, er B68 aftast við 20 stigum. Sigurin ber við sær, at 07 Vestur hevur 25 stig. Tað er sama stigatal, sum AB og Skála hava.

B68 hevur ikki møguleika at vinna fleiri enn 23 stig, og tí er tað greitt, at tað í 2027 verður leygardagsfótbóltur á Svangaskarði.

Í hesum umfarinum hevur B68 verið í bestu deildini síðani 2021 ella í seks ár.

Tíggju minuttir undan steðginum var tað miðvallarin Edvin Jakobsen, sum eftir upplegg frá Casper G. Hansen legði 07 Vestur framum 1-0.

Tveir minuttir seinni svaraði B68 aftur. Karstin Clementsen javnaði til 1-1, og tað var Sebastian Lau Nielsen, sum átti uppleggið.

Ein tími var farin, tá ið 07 Vestur skoraði 2-1 sigursmálið. Málskjútti var Elvar Gudmundsson, og tað var liðformaðurin Jasper Van Der Heyden, sum átti uppleggið.

Í síðsta umfari, sum verður leygardagin, fer 07 Vestur at spæla finalu í stríðnum um at sleppa undan niðurflyting. Tað verður á útivølli ímóti AB.