Arbeiðið inni í Dalstunlinum gongur væl, og nú eru bert 230 metrar eftir at bora. Væntandi er, at seinasta skotið verður latið av fyrst í november í ár. Men, hetta veldst alt um, hvørt vegurin niðan til tunnilin dalsmegin og portalurin, sum tunnilin skal koma út ígjøgnum, verður liðugt til tíðina.

Tvídráttur tók seg upp millum Landsverk og jarðeigarar í Dali um prísin fyri lendið, sum vegurin skal ganga ígjøgnum og til lendið, har ætlaði tunnilsmunnin skal verða. 

Vegurin, sum skal gerast, verður kanska einar hundrað metrar langur ella so, og síðan skal portalurin gerast. Um hesi arbeiði kunnu gerast liðug, soleiðis at tunnilin kann skjótast ígjøgnum fyrst í november, er í løtuni ógreitt, men miðjað verður eftir hesum.

Higartil er einki gjørt í Dali, men soleiðis, sum In.fo skilir, eru partarnir nú komnir til semju um lendið.

Væntandi er, at tey formellu viðurskiftini fara at koma upp á pláss innan eina viku til 14 dagar, og tá viðurskiftini eru í lagi, kann Landsverk fara í gongd.
Tað er í øllum førum greitt, at Dalstunnilin verður ikki skotin ígjøgnum, so leingi, sum portalurin í Dali ikki er gjørdur.

Men, her verður eingin portalur, so leingi, sum eingin vegur er niðan til ætlaða tunnilsmunnan. Nú er so líkt til, at ein loysn er nær, og gongur alt væl, verður Dalstunnilin helst skotin ígjøgnum tíðliga í november í ár. 

Dalstunnilin verður 2.200 metrar langur og átta metrar breiður. Húsavíkarmegin eru 200 metrar av vegi gjørdir niðan til tunnilsmunnan. Nú skulu so 100 metrar av vegi aftrat gerast dalsmegin, umframt at portalur skal byggjast, soleiðis at tunnilin sleppur út í Dali.