Heri styrkir um Europakósina hjá HB

HB er frammanfyri 1-0, nú fyrri hálvleikur er liðugur í Montenegro

Tað er alt, sum bendir á, at HB verður við í lutakastinum, tá ið tað í næstu viku fer at verða drigið um, hvør skal møta hvørjum í Europa Conference League.

 

Nú fyrri hálvleikur er liðugur í øllum hitanum suðuri í Montenegro, er støðan 1-0 til HB, sum harvið samantalt er frammanfyri 5-0.

 

Heimaáskoðararnir góvu til kennar, nú tað varð bríkslað fyri, at fyrri hálvleikur var liðugur, at teir als ikki eru nøgdir við avrikið hjá heimaliðnum.

 

Málið skoraði Heri Hjalti Mohr, tá ið tað restaðu fimm minuttir av fyrra hálvleiki. Mikkel Dahl var staddur mitt fyri og ein metur uttanfyri brotsteigin, tá ið hann spældi í høgru til Hera Hjalta Mohr, sum úr eitt sindur spískum sendi bóltin millum beinini á málverjanum og í handara síðunetið.

 

Hjá HB snýr tað seg fyrst og fremst um at vinna samantalt. Sum tíðin fer, styrknað fyritreytirnar hjá HB, ið eftir fyrra dystin var frammanfyri 4-0.

 

Heimaliðið hevur verið meiri í álopsstøðu, men HB hevur fult og heilt tamarhald á verjupartinum, og so eydnaðist tað HB at skora, tá ið føroyska liðið spældi seg til fyrsta rættiliga málmøguleikan.

 

At hitin er so nógvur, sum hann er, er orsøkin til, at norðurírski dómarin miðskeiðis í fyrra hálvleiki bríkslaði fyri steðgi, so spælararnir fingu høvi at drekka vatn.