- So upprann dagurin, sum vit hava verið so ótrúliga spent upp á.
Tað siga tey, sum standa aftan fyri spildurnýggju kioskina á Sandi, sum í mong ár hevur verið í Trøðum.
- Vit lata upp mánamorgunin 24. januar klokkan 08 - og sjálvandi við nýbakaðum morgunbreyði.
Tey, sum hava rikið kioskina í leigaðum hølum í Trøðum, noyddust nú antin at gevast ella at finna sær onnur høli.
Og tíbetur valdu tey tað seinna.
Tað gleðir mong á Sandi og í Sandoynni sum heild, at nýtt leigumál er funnið, og at hølini nú eru klár at lata upp.
Nýggja kioskin - Kioskin á Bakarínum - verður nú í hølunum, har Anfinnur og Karin í Soylu høvdu bakarí í 40 ár.
Eyðvarur Petersen, sum eigur og rekur virksemið, hevur seinastu tíðina saman við øðrum baksast við at rigga nýggju hølini til.
Nú er komið undir land, og hetta verður ein góð og hugnalig kiosk, sum liggur sera væl fyri á Sandi við góðum parkeringsmøguleikum.
- Vit vóna, at tit fara at taka líka væl undir við nýggju kioskini, sum tit gjørdu, tá vit vóru í Trøðum, siga tey í Kioskini á Bakarínum, sum letur upp stundisliga í morgin.
