Tað eru stívliga tvey ár síðan, at reiðaríið P/F Jupiter við Jógvan Martini Ferjá Joensen sum reiðara keypti hetlendska uppsjóvarskipið, Altaire til Føroya. 

Nú bendir mangt á, at skipið kanska ikki verður so leingi í Kollafirði aftrat. 

Teir, sum eiga Christian í Grótinum og Norðborg í Klaksvík, eru nevniliga í samráðingum við Jógvan Martin um møguleikarnar at keypa umleið 20 ára gamla, Jupiter.

Kristian Martin Rasmussen, sum í løtuni er í Íslandi, sigur, at enn er eingin endalig avtala komin upp á pláss, men hann váttar, at samráðingar eru millum partarnar.

- Okkum vantar kvotur til okkara skip, sum liggja ein fittan part av árinum, tí kvoturnar eru minkaðar, samstundis sum fleiri skip nú skulu deilast um verandi kvotur.

Hann vísir á, at fyrst eru kvoturnar tiknar frá teimum skipum, sum vóru í uppsjóvarvinnuni og latnar øðrum, og nú er neyðugt at keypa hesar kvotur aftur, um skipini ikki skulu liggja.

- Vit hava Norðborg og Christian í Grótinum, sum báðir hava ov lítlar kvotur og tískil liggja skipini einar 3, 4 ella 5 mánaðir av árinum.

Kristian Martin Rasmussen sigur, at áður vóru uppsjóvarskipini átta í tali. Nú eru skipini 20, samstundis sum kvoturnar eru minkaðar. 

- Hetta hongur slett ikki saman, og tískil royna vit nú at keypa okkum kvoturnar, sum kunnu muna eitt sindur, sigur hann.

Hann leggur tó dent á, at enn er Jupiter ikki keyptur, og enn er eisini ov tíðliga at siga, um keypið fer at koma upp á pláss ella ei.

- Um vit keypa skipið, verður tað kanska í vinnu í eina tíð, men vit hugsa í fyrsta lagi um kvoturnar, sum skipið eigur, sigur Kristian Martin Rasmussen.

Hann væntar, at kemur ein avtala upp keyp upp á pláss, verður Jupiter, sum annars er eitt gott og lítið slitið skip, helst selt aftur.