Fleiri grindir hava verið higartil í ár og tað hevur Sea Sepherd gjørt sær dælt av. Tey hava havt fólk í øllum grindadrápinum, har tey hava gingið ímillum beinini á grindamonnum og hava tikið alt upp á film og myndir. Umboðini fyri Sea Shepherd hava verið so ágangandi, at tað hevur verið provokerandi, og í einstøkum førum hevur tað eisini eydnast at fáa grindamenn at loypa fram av, tó uttan at nakar skaði er hendur - uttan á Hvannasundi, har ein drona varð skotin niður.
Men nú vil Grindamannafelagið hava, at grindalógin verður herd. Tískil bað Grindamannafelagið fyrr í ár um fund við landsstýrið um málið, og eitt endamál við herðingini er at sleppa undan støðum, sum tað hava verið fleiri av í summar, har umboð fyri Sea Shepherd hava gingið runt í grindadrápum og hava rent myndatól upp í eyguni á grindamonnum.
Ólavur Sjúrðarberg, formaður í Grindamannafelagnum, sigur, at í grindalógini stendur, at sýslumaður KANN lýsa eitt ávíst øki rundan um ein grindarakstur, og eitt grindadráp, sum grindaøki, eisini loftrúmið uppi yvir.
Men Grindamannafelagið vil nú hava, at lógin verður broytt, so at tað fer at standa í henni, at sýslumaðurin SKAL lýsa eitt øki rundan um grindaraksturin og grindadrápið at vera grindaøki.
Grindamannafelagið vil eisini hava, at tað verður sett í lógina, at grindaøkið á landið skal verða avbyrgt, so at bara tey, sum eru í sjálvum drápinum, sum sleppa inn á grindaøkið, men at áskoðarar eru uttan fyri.
Ólavur Sjúrðarberg heldur, at fyri trygdina eigur eitt grindaøki at verða avbyrgt fyri øll, sum ikki eru við í grindini, tí grindamenn hava hvassar og stórar knívar. Sostatt er taðeisini ein trygdarspurningur, at tað verður syrgt fyri, at áskoðarar, sum einki hava við tað at gera, verða hildnir burtur frá. Samstundis hjálpir tað eisini til, at halda víðgongdum umhvørvisfólkum, burtur frá grindaøkinum.
Eitt, sum hevur verið umrøtt í sambandi við grindirnar í summar, er, at løgreglan eigur at vera til staðar, tá ið grindadráp er fyri at tryggja, at lóg og landaskil verður hildið, og at óviðkomandi ikki halda seg burtur, og ikki sleppa at provokera grindamenn.
Ólavur Sjúrðarberg minnir á, at tað stendur í grindalógini, at uppgávan hjá løgregluni er at verja fyri, at forðingar verða lagdar fyri grindadrápi. Men samstundis vísir hann á, at tað uppgávuna kann løgreglan ikki røkja av teirri einføldu orsøk, at hon er ikki til staðar, tá ið grindadráp er.
– Hetta er eisini ein spurningur, vit fara at taka upp á fundinum við landsstýrið, sigur Ólavur Sjúrðarberg.
