Sambært eini kanning, sum YouGov hevur gjørt fyri norska depilin fyri friðargransking (PRIO – Peace Research Institute Oslo) halda 41% av teimum spurdu norðmonnunum, at eitt nýtt heimskríggj brestur á innan 10 ár eru liðin. 55% av teimum spurdu halda eisini, at eitt nýtt vápnað stríð fer at taka seg upp í Evropa.
Tað skrivar norska tíðindastovan NTB.
– Okkara kanning vísir, at norðmenn stúra fyri, at vit eru á randinum til stóran heimsumfatandi ófrið, og óttast ein komandi heimsbardaga og eina nýggja evropeiska ósemju, sigur Henrik Urdal, ið er leiðari fyri PRIO.
Kanningin hjá PRIO vísir, at tveir triðingar av teimum spurdu halda, at tað eru fleiri vápnaðar ósemjur í dag sammett við fyri 20 árum síðani. Ein meiriluti heldur eisini, at fleiri doyggja í dagsins ósemjum sammett við fyrr.
– Hetta undirstrikar tørvin á fleiri átøkum fyri friði og ósemjufyribyrging, sigur Henrik Urdal.
Ein meiriluti av teimum spurdu halda eisini, at á heimsstigi gongur fólkaræði aftur.
– Vit síggja í løtuni eina ógvusliga veiking av fólkaræðisligum rættindum og stovnum kring heimin. Fólkaræðislig afturgongd ger tað nógv truplari at mótmæla friðarliga. Niðurlagingin av fólkaræðisligum stovnum merkir, at vit missa friðarligar skipanir at loysa ósemjur og elvir til, at fólk í størri mun snúgva sær til harðskap. Hendan gongdin kann hava álvarsligar fylgjur við sær fyri altjóða støðufesti, sigur Urdal.
Ein meiriluti av teimum spurdu metir eisini, at altjóða stovnar sum ST og OSCE (Organisation for Security and Co-operation in Europe) hava minni týdning í dag enn fyrr.
Kanningin varð gjørd í døgunum 28. juni til 3. juli og 1022 vaksnir norðmenn vórðu spurdir.
