Russland sendir nú framkomnar loftverjuskipanir og radarar til Iran, sum er farið at fyrireika seg til at løna aftur eini atsókn móti Hamasovastanum Ismail Haniyeh, sum varð myrdur í iranska høvuðsstaðnum Tehran. Iran heldur seg vita, at ísrael stóð fyri atsóknini. Tað skrivar the New York Times, sum endurgevur dulnevndar keldur.
Fyrrverandi russiski verjumálaráðharrin, Sergej Sjojgu, sum nú er skrivari í russiska trygdarráðnum, var mánadagin í Iran, har hann m.a. hitti iranska forsetan, Masoud Pezeshkian. Í samband við vitjanina tosaði Pezeshkian í hvøssum vendingum um ísraelskar “brotsgerðir móti teimum kúgaðu og verjuleysu fólkunum í Gaza” og um atsóknina, har Ismail Haniyeh varð myrdur.
LES EISINI: Iranski forsetin hittir fyrrverandi russiska verjumálaráðharran
“Islamiska lýveldið Iran ætlar sær undir ongum umstøðum at víðka kríggið og kreppuna í økinum,” segði Pezeshkian sambært iranskum miðlum. “Men brotsverkini og hugmóðin hjá hesum [tí ísraelska, red.] stýrinum fara avgjørt at verða svarað.”
Kreml fordømdi atsóknina, har beint varð fyri Haniyeh, sum var politiskur ovasti í Hamas.
LES EISINI: Kreml: Fordøma hvassliga atsóknina móti Hamasleiðara
Amerikanskir og ísraelskir embætisfólk hava boðað frá, at tey vænta at Iran og tess sameindu í økinum skjótt fara undir eitt stórt og samskipað álop á Ísrael. Teir sameindu bólkarnir, sum ofta verða róptir 'mótstøðuásin' (en: The Axis of Resistance) fevna um Hizbollah í Libanon og Houthirørsluna í Jemen.
