Kinesiski forsetin, Xi Jinping, tók í dag ímóti amerikanska forsetanum, Donald Trump, á flogvøllinum í kinesiska stórbýnum Shenzhen. Teir báðir hálsfevndust, áðrenn teir gingu eftir reyða teppinum til bilarnar.
Fram við teppinum stóðu fólk og veittraðu við kinesiskum og amerikanskum fløggum. Trump smíltist og klappaði, vísa upptøkur av móttøkuni.
Fleiri miðlar leggja dent á, at Xi sjálvur fór út á flogvøllin. Sambært Laura Bicker, tíðindafólki hjá BBC, verður hildið, at hetta er fyrstu ferð, Xi sum forseti hevur tikið ímóti einum útlendskum leiðara á einum flogvølli.
Við móttøkuni endurgalt Xi gestin hjá Trump frá september. Tá tók Trump ímóti kinesiska forsetanum á herflogstøðini Joint Base Andrews uttan fyri Washington D.C. Sambært kinesisku tíðindastovuni Xinhua segði Xi við Trump, at hann ynskir støðug viðurskifti millum londini.
Donald Trump og Xi Jinping klappa undir móttøkuni á flogvøllinum í Shenzhen í dag.
Mynd: Mandel Ngan/Ritzau Scanpix
Ukraina ávarar um eitt „nýtt Jalta“
Í morgin hittast Trump, Xi og Putin í Shenzhen, sum er vertur fyri fundinum í búskaparsamstarvinum APEC.
Ukraina hevur ávarað um, at trípartafundurin kann gerast eitt „nýtt Jalta“. Sipað verður til toppfundin á Krim í 1945, tá leiðararnir í USA, Bretlandi og Sovjetsamveldinum samráddust um, hvussu Evropa skuldi skipast eftir seinna heimsbardaga.
Dmitrij Peskov, talsmaður hjá Kreml, hevur víst aftur, at endamálið við fundinum er at býta heimin millum stórveldini.
Putin og Xi høvdu longu í dag ein fund sínámillum í sambandi við APEC. Teir róstu samstarvinum millum Russland og Kina og lovaðu fleiri stig í átt móti einari heimsskipan við fleiri stórveldum.
Ritzau