Amerikanski forsetin, Donald Trump, ætlar at halda ein tvípartafund við russiska forsetan, Vladimir Putin, í Kina í morgin. Tað sigur ein amerikanskur embætismaður við tíðindastovuna AP, sambært Ritzau.
Verður fundurin hildin sum ætlað, er tað fyrstu ferð síðani toppfundin í Alaska í august 2025, at Trump og Putin hittast uttan aðrar ríkisleiðarar. Á fundinum í Alaska umrøddu teir kríggið í Ukraina. Eingin ítøkilig semja um kríggið spurdist burturúr.
Báðir forsetarnir komu mikudagin til kinesiska stórbýin Shenzhen í sambandi við toppfundin hjá búskaparsamstarvinum APEC. Teir heilsaðu upp á hvønn annan og Xi Jinping. Hósdagin skulu allir tríggir eisini halda ein felags fund.
Semja um at býta um krígsfangar
Boðini um tvípartafundin koma eina viku eftir, at sendinevndir úr USA, Russlandi og Ukraina hittust til samráðingar í Sameindu Arabisku Emiratunum. Har varð semja gjørd um at býta um krígsfangar.
Síðani fóru amerikonsku sendimenninir Jared Kushner og Steve Witkoff til Moskva at hitta Putin og haðani til Dublin, har teir hittu ukrainska forsetan, Volodymyr Zelenskyj.
Trump hevur fleiri ferðir funnist at Zelenskyj. Í oktober segði hann, at ukrainar áttu at valt ein annan forseta, og at Zelenskyj hevði latið fleiri møguleikar at samráðast um eina friðaravtalu við Russland fara aftur við borðinum.
Stutt frammanundan hevði Trump sambært Ritzau gjørt eina avtalu við Russland um veiting av russiskari dieselolju til USA. Eina viku eftir útsøgnina um Zelenskyj setti hann fleiri ætlað amerikonsk revsitiltøk móti Russlandi í bíðistøðu.
Ritzau / AP