Føroyski Karl Weihe úr Sandavági verður millum luttakararnar í kendu donsku sjónvarpsrøðini Ex on the Beach. Tað váttar hann fyri in.fo í kvøld.

Men hvussu ber tað til, at hann er við í hesari sending?

– Eg eri við í Ex on the Beach, tí at tað er akkurát eg við massar av energi og sjálvsáliti og einum dreymi um at síggja meg sjálvan í sjónvarpinum. Sosialir miðlar eru blivnir ein stórur partur av verðini, so at blíva størri á har kann ikki skaða, sigur hann.

Ex on the Beach er ein reality-sjónvarpsrøð, har ung støk fólk hittast og flyta inn í eina luksus-villa saman í Grikkalandi. Meðan luttakararnir eru har, hendir alt møguligt stuttligt og óvæntað - har verður í hvussu er ikki spart uppá alkohol og drama. Luttakararnir kunnu til dømis væl vænta, at eks-dama ella eks-sjeikur knappliga møtir upp.

Upptøkurnar eru gjørdar og premieran verður kunngjørd skjótt, fortelur Karl Weihe, sum hevur fingið eitt stórt upplivilsi av at verið við í hesum.

– Tað var eitt ævintýr. Tú hevur einki samband til tí veruligu verðina, tú hevur ikki telefon ella klokkuslett, so tú fyriheldur teg bara til tað, sum er har. Tað vil siga sól og summar í einari luksus villa við ungum frískum singlum og villum ballum, fantastiskt, sigur hann.

Hvat kunnu fólk forvænta?

– Fólk kunnu forvænta eina heilt serliga sæsong av Ex on the Beach við einum brennandi heitum cast, drama, spenningi, kærleika og nøkrum, man aldrin hevur sæð fyrr, sigur hann.

At Karl Weihe verður millum luttakararnar, varð avdúkað í dag. Í einum videobroti verður hann presenteraður, har hann fortelur um seg sjálvan. Hygg eftir tí HER

Til ber annars eisini at fylgja Karl Weihe her á Instagram.