Tilsamans 14,2 milliardir krónur vórðu goldnar út í A-skattaðum lønum í Føroyum frá september í fjør til og við august í ár.

Tað eru 840 milliónir krónur meira enn 12 mánaðirnar frammanundan og svarar til ein vøkstur upp á 6,3 prosent. Tað vísa nýggj tøl frá Hagstovu Føroya.

Ein stórur partur av vøkstrinum stavar frá fiskivinnuni. Botnfiskiveiða og botnfiskiveiða, har fiskurin verður virkaður umborð, áttu tilsamans ein vøkstur upp á 242 milliónir krónur. Tað svarar til sløk 30 prosent av øllum lønarvøkstrinum seinasta árið.

Eisini aðrar vinnur hava havt munandi vøkstur. Í flutnings- og goymsluvinnuni vuksu útgoldnu lønirnar 113 milliónir krónur, í framleiðsluvinnuni 101 millión og í almennari umsiting og verju 82 milliónir krónur.

Menn eiga størsta partin

Menn fingu 62 prosent av teimum 14,2 milliardunum, sum vórðu goldnar út í lønum. Teir áttu eisini 69 prosent av sjálvum lønarvøkstrinum.

Útgoldnu lønirnar til menn vóru 7,1 prosent hægri enn undanfarna 12-mánaðarskeið, meðan vøksturin hjá kvinnum var 5 prosent.

Munur er eisini á privata og almenna arbeiðsmarknaðinum. Hjá arbeiðsgevarum undir privatum ræði vaks lønarútgjaldið 7,7 prosent, meðan vøksturin hjá arbeiðsgevarum undir almennum ræði var 4,2 prosent.

Størsti vøksturin í Sandoynni

Landafrøðiliga er størsti vøksturin hjá løntakarum, sum búgva í Sandoyar øki. Har vuksu útgoldnu lønirnar 13,3 prosent.

Hinvegin var vøksturin minstur í Norðurstreymoy, har hann var 3,7 prosent.

Hagstovan vísir á, at lønarvøksturin sum heild hevur verið støðugur seinastu árini.

Hagtølini fevna um A-skattskylduga løn, men ikki eitt nú eftirløn og onnur sosial gjøld, sum arbeiðsgevarin rindar.