Fyrsta liðið at spæla seg í hálvfinaluna í kappingini um løgmanssteypið var HB.
Í kvøld eru fjórðingsfinalurnar, og HB vann 2-1, tá ið AB var gestur í Gundadali.
Jón Krosslá Poulsen var venjari og Rógvi N. Poulsen hjálparvenjari hjá AB, sum í fyrsta minutti legði seg á odda. Málskjútti var væl upplagdi Marius Kryger Lindh.
Savic Dalibor var nýggjur maður á HB beinkinum. Hóast tað var skelkur hjá honum og hansara monnum at fáa mál ímóti sær beinanvegin, so eydnaðist tað at skora tvey mál og vinna 2-1.
AB var frammanfyri 1-0 eftir fyrra hálvleik.
17 minuttir undan leikloki javnaði HB. Málskjútti var Pætur J. Petersen, sum var millum teir fyrstu ellivu. Tað hevur hann ikki verið so ofta fyrr í ár.
Sjey minuttir undan leikloki skoraði HB sigursmálið. Tað skoraði Áki D. Samuelsen, sum longu eftir eitt korter avloysti Heðin Hansen. Uppleggið til sigursmálið átti Adrian Justinussen.
