Føroyska heilsuverkið hevur seinastu árini arbeitt miðvíst við at fáa fleiri læknar til Føroya og geva teimum møguleika at taka størri partar av serlæknaútbúgvingini her heima.

Men nú kann fíggjarlógaruppskotið fyri 2027 seta hetta arbeiðið aftur.

Tað ávara Yngri Læknar Føroyar um.

Í vár varð avtala gjørd millum føroyska heilsuverkið og danska heilsustýrið um, at fimm høvuðsútbúgvingarstørv skulu kunna vera í Føroyum árliga.

Men sambært Yngri Læknum eru bert tvey av teimum fimm størvunum fíggjað næsta ár.

Tað merkir, at tríggir av teimum ætlaðu útbúgvingarmøguleikunum kunnu detta burtur, um fíggjarlógaruppskotið verður samtykt óbroytt.

Læknar kunnu noyðast av landinum

Yngri Læknar vísa á, at møguleikin at taka útbúgving í Føroyum hevur havt stóran týdning fyri at fáa føroyskar læknar heim.

Fyrr var vanligt, at læknar máttu vera uttanlands stóran part av útbúgvingartíðini. Nú er møguleikin at taka fleiri útbúgvingarstig í Føroyum munandi betri.

Men manglandi fíggingin kann fáa læknar at søkja útbúgvingarstørv uttanlands.

Tað kann aftur gera tað truplari at fáa teir heim til Føroya eftir lokna útbúgving.

Í dag eru minst 14 inngangsstørv og 17 høvuðsútbúgvingarstørv innan almenna medisin í Føroyum, umframt útbúgvingarmøguleikar innan aðrar sergreinar.

Yngri Læknar vísa eisini á, at meira enn 100 føroyingar lesa læknafrøði uttanlands.

Serlæknapuljan eisini burtur

Ein onnur stór avbjóðing er, at eingin játtan er sett av til serlæknapuljuna í 2027.

Puljan hevur verið brúkt til at seta nýggjar serlæknar í størv, har eingin vanlig normering er tøk frammanundan.

Verður puljan ikki varðveitt, kunnu nýútbúnir serlæknar, sum annars kundu komið heim at arbeiða, noyðast at søkja starv uttanlands.

Samstundis stendur játtanin til útbúgving av yngri læknum í stað.

Yngri Læknar óttast, at tað fer at merkja færri útbúgvingarstørv og verri møguleikar at luttaka á neyðugum skeiðum.

Felagið heitir tí á landsstýrið og Løgtingið um at varðveita serlæknapuljuna og tryggja fígging til øll tey fimm avtalaðu høvuðsútbúgvingarstørvini.

Hvat kostar at fíggja hini trý?

Enn er ikki greitt, hvussu nógv tað hevði kostað at tryggja fígging til tey trý høvuðsútbúgvingarstørvini, sum sambært Yngri Læknum vanta í fíggjarlógaruppskotinum.

Tað er heldur ikki staðfest, um landsstýrið ætlar at broyta játtanina undir viðgerðini av fíggjarlógini.

Málið reisir tí spurningin, hvussu Føroyar skulu røkka málinum um at útbúgva og seta fleiri serlæknar í starv, um fíggingin til útbúgving og nýggj størv ikki fylgir við.

Kelda: Yngri Læknar Føroyar.