Jóannes Eidesgaard gjørdist formaður í Reyða krossi tá hann gavst í politikki í 2016. Hann hevur lagt seg eftir at Reyði krossur Føroya skal vera sjónligur og virkin í samfelagnum.

-        Hetta hevur eydnast væl, tað er ikki ein sál í Føroyum sum ivast hvat í Reyði Krossur er. Tað hevur ikki staðið á at fáa stuðul, og vit hava breitt virksemið út um landið. Tað eri eg glaður fyri. Hjólini í Reyða Krossi koyra nógv skjótari enn tey gjørdu fyri 10 árum síðani.  

Virksemið hevur støðugt vundið uppá seg, og nevndin er komin í tað støðu, at hon má taka støðu til, um Reyði Krossur skal blíva við at vaksa, ella standa í stað.

-        Eg vil siga, at tá tú kemur til tað ásannan at tú ikki skal vaksa, tá er tí at gevast, tí tað má altíð vera eitt mál at tingini skulu útbyggjast og blíva betur, og tað haldi eg at nevndin er sinna at gera, tí arbeiða vit við at finna betur hølisviðurskifti.

Í 2016 vóru húsini á Bryggjubakka kraftmiðdepilin hjá Reyðakrossi, men hesi hús kunnu á ongan hátt hýsa øllum virkseminum sum er í dag. Reyði krossur Føroyar hevur 500 sjálvboðin knýtt at sær, og hølini sum Reyði Krossur hevur í Stiðjagøtu eru eisini ov lítil.

- Húsini eru við at spreingjast, klædnaskiljingin hevur ein trupulleika, tí tey kundu gjørt nógv meira um tey høvdu betrið pláss. Handilin kundi eisini selt meira um hann hevði betur pláss, skulu vit halda fram av vaksa, mugu vit loysa henda bráðfeingis hølistrupulleikan, og tað eru vit farin í holt við at fyrireika.

Hjálpin hevur eitt mark

Reyði krossur Føroya røkir nakrar grunleggjandi uppgávur í samfelagnum, og tí er nærleggjandi at spyrja hvør uppgávan er hjá einum vælgerandi felagsskapi, og hvør uppgávan hjá almennu myndugleikunum er.

-        Hatta havi eg ofta kjakast við nevndina um. Vit hava eitt vælvirkandi samfelag, men mugu ásanna at tað nøkur hol eru, sum fólk detta niður ímillum. Tey holini kunnu vit vera við at tetta. Mat og klædnahjálpin tettir nøkur hol, men vit skulu ikki áseta hvussu almennu viðurskiftini skulu vera í Føroyum, tað uppgávuna eiga politikararnir.

Meginreglan hjá Reyða krossi er, at fíggjarligar veitingar verða ikki lætnar, heldur gevur felagsskapurin tænastur av ymiskum slagið, so sum hjálp til mat og klæðir.  

100 ára haldið hjá Reyða krossi Føroya verður hildið í kvøld. Stóra landsinnsavningin, verður send beinleiðis í Kringvarpi Føroya, á skránni verður tónleikur, samrøður og innsløg um hjálpararbeiðið.

Les alla samrøðuna við Jóannes Eidesgaard í Sosialinum