Tað er framvegis ógreitt, um ein tekniskur trupulleiki við bilinum ella ein menniskjansligur feilur var orsøkin til, at ein ruskbilur hjá Landleiðini fór á rull á Argjum 2. oktober.

Tað upplýsir vaktleiðarin á løgreglustøðini í morgun. Løgreglan arbeiðir enn við málinum, men hevur higartil ikki funnið eina frágreiðing upp á, hví bilurin fór á rull.

Leisið eisini: Myndir: Ruskbilur á rull á Argjum

Sum vit áður hava skrivað, segði bilførarin eftir óhappið, at bremsurnar vóru settar til. Løgreglan upplýsti tá, at bremsurnar áttu at hildið bilinum, men enn er ikki staðfest, hvat gekk galið.

Óhappið hendi um hálvgum áttatíðina um morgunin, meðan rusk varð savnað inn í Rosságøtu. Ruskbilurin stóð mannleysur ovast í gøtuni, tá hann fór á rull.

Hann rullaði einar 80 metrar oman brekkuna, breyt betonggarðar og rakti eini hús, áðrenn hann steðgaði í einum urtagarði. Eingin fólkaskaði hendi, men bilurin gjørdi stóran materiellan skaða á garðar og hús.

Tað var eitt stórt arbeiði at fáa gott 20 tons tunga bilin úr urtagarðinum aftur. Ein stórur krani varð boðsendur, og eftir fleiri tíma arbeiði varð bilurin lyftur upp á ein blokkvogn.

Nú nærum ein mánaður er liðin, heldur løgreglan fram við kanningunum fyri at fáa greiði á orsøkini.