Í kvøld spældi liðið hjá Jóhonnu Fossdalsá, BK Häcken annan dystin í Champions League deildarspælinum.

Á heimavølli á Nordic Wellness Arena í Göteborg tapti Häcken 0-3 fyri Juventus.

Tá Jóhanna kom á vøllin í 55. minutti var støðan javnleikur 0-0. Innanfyri ein hálvan tíma skoraði italska liðið tríggjar ferðir.

Juventus hevði bóltin 69 prosent av tíðini, og tær høvdu fleiri royndir innanfyri málrammurnar, og í trimum førum tóku tær av.

Aftaná tveir dystir hevur Häcken framvegis fyrsta stigið til góðar í deildarspælinum.

Komandi sunnudag klokkan 14 hevur Häcken aftur dyst á heimavølli, hesaferð í bestu svensku fótbóltsdeildini. Tá kemur botnproppurin, Uppsala á vitjan.

Häcken er fremst í deildini við 55 stigum, og Hammarby er næstfremst við 50 stigum nú seks dystir eru eftir at leika.