Formaðurin í svenska Ríkisdegnum, Andreas Norlén, gjørdi mikudagin enn eina roynd at fáa gongd á stjórnarsamráðingarnar.

Men higartil er eingin framgongd. Eingin floksleiðari er til reiðar at átaka sær uppgávuna at skipa stjórn, skrivar svenska tíðindastovan TT.

Mánadagin boðaði Magdalena Andersson, forkvinna í Socialdemokraterna, frá, at hon gavst við síni roynd.

Hetta hendi, hóast flokkur hennara og hinir flokkarnir á reyðgrøna vonginum fingu ein tepuran meiriluta á ríkisdagsvalinum fyrr í mánaðinum.

Vísa á hvønn annan

Magdalena Andersson heldur nú, at politiski mótstøðumaðurin, Ulf Kristersson, forsætisráðharri og formaður í Moderaterna, eigur at taka yvir.

Men Kristersson vísir á, at Socialdemokraterna, Centerpartiet, Miljöpartiet og Vänsterpartiet hava meiriluta eftir valið. Tí eiga hesir flokkar at royna at skipa stjórn, heldur hann.

Týsdagin segði hann seg tó vera til reiðar, um grundarlag er fyri eini stjórn, sum ikki er sosialistisk.

Ein trupulleiki er, at Centerpartiet hvørki vil samstarva við Sverigedemokraterna á borgarliga vonginum ella við Vänsterpartiet.

Vänsterpartiet krevur ráðharrasessir

Ein svensk stjórn nýtist ikki at hava ein meiriluta aftan fyri seg, men hon kann ikki hava ein meiriluta ímóti sær. Ein minnilutastjórn kann tí vera ein loysn, um nóg nógvir flokkar uttan fyri stjórnina góðtaka hana.

Vänsterpartiet vil tó ikki bara vera stuðulsflokkur hjá eini stjórn á vinstravonginum.

– Sjálvandi skulu vit sita í eini stjórn. Annars ber ikki til at rokna við hesum 30 sessunum, sigur floksforkvinnan, Nooshi Dadgostar, sambært TT.

Hon er opin fyri, at forkvinna Centerpartiets, Elisabeth Thand Ringqvist, roynir at skipa stjórn, hóast Centerpartiet ikki vil í stjórn saman við Vänsterpartiet.

Ringqvist heldur tó ikki, at tað er aktuelt. Hon leggur Vänsterpartiet undir at forða fyri víðari samráðingum.

Centerpartiet vil helst hava eina stjórn á politisku miðjuni við Magdalenu Andersson sum forsætisráðharra.

Åkesson vil hava støðuna greiða

Formaðurin í Sverigedemokraterna, Jimmie Åkesson, mælir til eitt nýtt umfar, har flokkarnir taka støðu til, um teir vilja stuðla Andersson sum forsætisráðharra.

– Tað eigur at henda skjótast gjørligt, so vit kunnu koma víðari í tilgongdini, sigur hann við TT.

/Ritzau/