Portugal heldur fram við fyrireikingunum til Nations League-dystirnar móti Danmark og Noregi uttan Cristiano Ronaldo.

Portugisiska fótbóltssambandið váttar á heimasíðu síni, at 41 ára gamli áleyparin er farin úr landsliðsleguni. Hinir 24 spælararnir fyrireika seg framvegis til dystin í Parkini hósdagin og heimadystin móti Noregi sunnudagin.

– Øll landsliðsferðin hevur framvegis fult fokus á komandi uppgávurnar hjá landsliðnum og á at røkka ásettu málunum, skrivar sambandið.

Skuldi ikki byrja inni

Ófriðurin tók seg upp mikudagin, tá Ronaldo fór avstað frá ætlaðu venjingini í Parkini. Hann varð koyrdur burtur í bili, og umleið ein tíma seinni frættist, at privatflogfar hansara var á veg til Danmark.

Landsliðsvenjarin Jorge Jesus hevði annars júst sagt á tíðindafundi, at Ronaldo fór at venja við liðnum. Hann gjørdi samstundis greitt, at áleyparin ikki skuldi byrja inni móti Danmark.

Jesus legði eisini dent á, at tað er hann, sum setur liðið.

– Ronaldo skal ongantíð broyta mínar ætlanir. Sigi eg, at hann ikki skal inn, so kemur hann ikki inn, segði venjarin.

Hann vísti samstundis aftur, at Ronaldo hevði noktað at venja undan dystinum, hóast hann hevði verið fráverandi. Sambært venjaranum hevði Ronaldo tvørturímóti víst forstáilsi fyri tí leikluti, hann fór at fáa.

Vil seinni greiða frá

Í kvøld váttaði Ronaldo sjálvur á Instagram, at hann var farin úr leguni.

– Eftir tíðindafundin hjá landsliðsvenjaranum og eina samrøðu við forsetan í portugisiska fótbóltssambandinum havi eg gjørt av at fara úr landsliðsleguni, skrivaði hann.

Hann gav onga nærri frágreiðing um orsøkina, men boðaði frá, at hon kemur seinni.

– Tá tíðin er komin, fari eg at siga øllum portugisum sannleikan um orsøkirnar til, at eg eri farin frá landsliðnum, sum eg altíð havi givið meg fult og heilt fyri.

Ronaldo endaði við at ynskja Portugal og øllum liðfeløgunum góða eydnu.

/Ritzau/