Tvey føroyingalið vóru í leiki í bestu donsku hondbóltsdeildini hjá kvinnum.
Jana Mittún og liðfelagarnir í Viborg høvdu eina stóra favorittstøðu undan dystinum á útivølli móti Ringkøbing, ið einki stig hevði undan dystinum í kvøld.
Men heimaliðið skelkaði Viborg í fyrra hálvleiki, og í steðginum var støðan 21-14 til Ringkøbing. Viborg fekk betri skil á í seinna hálvleiki, men tær megnaðu ikki at minka um munin, og endin var, at Ringkøbing vann dystin 35-28. Avgjørt ein strika í rokningini hjá Viborg.
Jana skoraði fýra mál upp á sjey málroyndir, og hon legði upp til trý mál.
Viborg hevur seks stig fyri fimm dystir.
Tá gekk munandi betri hjá Maritu Mortensen og liðfeløgunum í Nykøbing-Falster. Tær vunnu á heimavølli stórsigur 30-18 á NordVestjysk Elite. Í steðginum var støðan 17-11 til Nykøbing-Falster.
Marita skoraði tvey mál upp á fýra málroyndir, og hon vann liðnum eitt brotskast.
Nykøbing-Falster hevur eisini seks stig fyri fimm teir fyrstu dystirnar í kappingini.
Fríggjadagin klokkan 17.30 spæla Maria P. Nólsoy og liðfelagarnir í Keypmannahavn dyst á útivølli móti Silkeborg-Voel.
