120 fólk í Danmark, sum hava fingið noktandi svar upp á umsókn sína um friðskjól, lúka treytirnar fyri at kunna verða send til eina móttøkumiðstøð í Ruanda í 2027. Tað upplýsir danska útlendinga- og integratiónsmálaráðið fyri Politiken og DR, sambært Ritzau.
Russar, iranar og sýrar eru teir tríggir størstu bólkarnir og telja tilsamans 41 prosent av teimum 120. Málaráðið hevur ikki upplýst, hvussu nógv eru úr hvørjum landi.
Í fyrsta umfari er ætlanin at senda vaksin, sum hava fingið noktandi svar um friðskjól, eru uttan børn undir 18 ár og ikki samstarva um at fara aftur til heimlandið. Fólk, sum eru dømd til útvísing í einum revsimáli, eru uttan fyri fyrsta málbólkin.
Fimm lond skulu deila umleið 100 pláss
Danmark, Týskland, Niðurlond, Eysturríki og Grikkaland arbeiða fram ímóti einari felags karmavtalu við Ruanda. Síðani skulu londini gera sínar egnu avtalur. Danmark skal gera eina løgfrøðiliga bindandi avtalu við Ruanda.
Ætlanin er at hava umleið 100 pláss á einari opnari móttøkumiðstøð, sum londini skulu deila. Plássini kunnu brúkast av nýggjum, tá fólk flyta víðari. Enn er ógreitt, hvussu plássini verða býtt millum londini.
– Nú fara vit veruliga at taka tamarhaldið á evropeisku landamørkunum aftur, segði danska forsætisráðfrúan, Mette Frederiksen, tá ætlanin varð løgd fram.
Danski útlendinga- og integratiónsráðharrin, Morten Bødskov, hevur áður sagt, at Danmark væntar at vera til reiðar at senda tey fyrstu til Ruanda fyri árslok 2027.