Fótbóltsstjórin í DBU, Peter Møller, sigur, at talan er um ein av størstu profilunum í danskari landsliðssøgu.
– Kasper hevur verið ein av teimum størstu profilunum í danskari fótbóltssøgu, sigur Peter Møller í skrivligari viðmerking.
39 ára gamli Kasper Schmeichel hevur spælt 120 landsdystir fyri Danmark og hevur í nógv ár verið fastur málverji á landsliðnum.
Ein álvarsligur akslaskaði hevur nú noytt hann at gevast.
Sambært DBU hevur Schmeichel havt stóran týdning bæði á og uttanfyri vøllin.
– Við sínum sterka vinnarahuga, sínum professionalismu og sínum arbeiði fyri at náa tí perfekta hevur hann havt ómetaligan týdning fyri menningina og framgongdina hjá landsliðnum, sigur Peter Møller.
Kasper Schmeichel fekk landsliðsdebut í 2013 í einum dysti móti Makedonia, sum Danmark tapti 0-3. Eftir eina tíð sum eykamálverji vann hann sær fast pláss í 2014 og helt síðani fast um sessin í nógv ár.
DBU-stjórin sigur eisini, at Schmeichel hevur verið ein fyrimynd fyri børn og ung.
– Hann hevur umboðað Danmark og landsliðið við stoltleika og hjarta og hevur verið ein sterkur leiðari og mentanarberi fyri fleiri ættarlið av spælarum, sigur Peter Møller.
DBU ætlar at heiðra Kasper Schmeichel í Parkini í sambandi við ein landsdyst í heyst.