Í dag vunnu Elias Ellefsen á Skipagøtu og liðfelagarnir í THW Kiel fjórða dystin á rað í týsku bundesliguni.
Á útivølli móti Erlangen eydnaðist tað THW Kiel í Arena Nuernberger Versicherung høllini at vinna 36-31 á Erlangen. Í steðginum var Kiel á odda 20-14.
Elias skoraði fimm mál upp á átta málroyndir. Í dag var hann sambært hagtølunum á vøllinum í 27 minuttir.
THW Kiel er fremst í deildini við 19 stigum fyri 11 dystir. Flensburg-Handewitt hevur 17 stig og SC Magdeburg hevur 16 stig, men tey bæði liðini hava leikt tveir dystir færri enn THW Kiel.
Ígjár tapti liðið hjá Vilhelmi Poulsen, Hannover-Burgdorf á heimavølli 26-29 (15-12) fyri Lemgo.
Hannover-Burgdorf er nummar níggju við 10 stigum.
Í morgin klokkan 15.30 hava Hákun West av Teigum og liðfelagarnir í Füchse Berlin dyst á heimavølli móti Wetzlar.
