Í sambandi við Torradagarnar, sum verða í Klaksvík 15. – 20. februar 2027, verður ein skrivikapping útskrivað.
Talan er um eina stuttsøgukapping, og uppgávan er at skriva eina stuttsøgu, sum liggur millum 1.200 – 1.500 orð. Stuttsøgan skal verða skrivað á føroyskum og ikki vera útgivin áður.
Latnar verða 1. og 2. virðisløn á 10.000 krónur og 5.000 krónur, og dómsnevndin tilskilar sær rætt til at avgera, um virðislønir verða latnar.
Í Klaksvíkar kommunu siga tey, at astuttsøgukappingin er opin, og kunnu øll luttaka. Tað er frítt at skriva eftir egnum ynski, har søguheitið er “Flemish Kap”.
- Tað er ikki ein fyritreyt, at tú hevur verið á Flemish Kap fyri at lata uppskot inn til skrivikappingina.
Stuttsøgan skal verða dómsnevndini í hendi í seinasta lagi hin 15. januar 2027.
- Handritið skal latast inn sum wordskjal og latast umvegis teldupost: [email protected] í seinasta lagi 15. januar 2027 klokkan 18.
Lagt verður aftrat, at navn og bústaður á rithøvundi skal upplýsast. Stuttsøgan verður síðan latin dómsnevndini ónavngivin.
- Í dómsnevndini sita Dorit Hansen, Eilen Anthoniussen og Annika Egholm.
Í Klaksvíkar kommunu siga tey, at vinnararnir verða avdúkaðir á samkomu á Torradagunum, leygardagin hin 20. februar 2027.