Føroyingar, sum eru limir í einum fakfelag, skulu eftir ætlan kunna draga ein part av limagjaldinum frá í skatti.
Tað er ein av broytingunum í einum nýggjum uppskoti um skattalógina, sum Fíggjarmálaráðið hevur latið Løgtinginum. Uppskotið er eitt fylgilógaruppskot til fíggjarlógaruppskotið fyri 2027.
Frádrátturin fyri fakfelagsgjald verður í mesta lagi 2.000 krónur í 2027. Frá 2028 verður hámarkið 4.000 krónur um árið.
Fakfeløgini skulu á hvørjum ári lata TAKS upplýsingar um limirnar og upphæddina, sum hvør einstakur hevur goldið í fakfelagsgjaldi. Upplýsingarnar skulu latast elektroniskt og skulu millum annað fevna um navn, bústað og p-tal.
Samdøgursfrádrátturin hækkar
Landsstýrið ætlar eisini at hækka samdøgursfrádráttin til 210 krónur.
Frádrátturin hevur serliga týdning fyri føroyingar, sum arbeiða uttanlands. Eftir verandi skipan skuldi hann stigvíst minkast, men við uppskotinum verður henda gongdin broytt.
Eisini stigvísa minkingin av uttanlandsfrádráttinum skal steðga. Frádrátturin verður sambært uppskotinum 30 prosent av skattskyldigu uttanlandsinntøkuni, tó í mesta lagi 84.000 krónur um árið.
Fiskimannafrádrátturin avmarkaður
Fiskimannafrádrátturin verður ásettur til 14 prosent av veiðiinntøkuni. Frádrátturin verður tó bara latin av teimum fyrstu 300.000 krónunum.
Tann parturin av veiðiinntøkuni, sum er hægri enn 300.000 krónur, verður sostatt ikki ávirkaður av fiskimannafrádrátti.
TAKS kann taka gjald
Uppskotið gevur harumframt landsstýrisfólkinum heimild til í kunngerð at áseta eitt gjald fyri hvørja einstaka lønarflyting. Tað merkir, at arbeiðsgevarar kunnu verða kravdir eftir gjaldi í sambandi við lønaravgreiðslu.
Ein broyting verður eisini gjørd í reglunum um tvískatting. Tá tvískatting verður avtikin, skal gjald til eitt annað norðurland, sum er fevnt av norðurlendsku avtaluni um sosiala trygd, kunna teljast sum goldin skattur. Tó kunnu í mesta lagi 6,5 prosent roknast við.
Flestu broytingarnar skulu eftir ætlan koma í gildi 1. januar 2027. Broytingin um norðurlendsk sosialgjøld skal tó hava virknað longu frá inntøkuárinum 2026.
