Hvussu nógv ferðast landsstýrisfólkini uttanlands, hvat kostar tað, og kundi peningurin og arbeiðstíðin verið brúkt betur?

Tað vil Steffan Klein Poulsen, løgtingsmaður, hava Aksel V. Johannesen løgmann at svara.

Í einum skrivligum §52a-fyrispurningi biður hann um eitt yvirlit yvir, hvussu nógvar ferðaútreiðslur hvørt einstakt aðalráð hevur havt, síðani nýggja landsstýrið tók við 13. apríl í ár. Dagfestingin samsvarar við, nær málsøkini vórðu býtt millum landsstýrisfólkini.

Hann vil eisini hava upplýst, hvussu nógvar dagar hvørt einstakt landsstýrisfólk hevur verið uttanlands í arbeiðsørindum í sama tíðarskeiði.

– Ringt at skilja

Steffan Klein Poulsen sigur, at tað er skiljandi, at løgmaður og landsstýrismaðurin í uttanríkismálum ferðast regluliga fyri at røkja føroysk áhugamál.

Men hann setur spurnartekin við ferðingina hjá hinum landsstýrisfólkunum.

– Tað er tó ringt at skilja, at tey landsstýrisfólk, sum primert varða av innlendismálum, brúka so nógva tíð í útlondum, skrivar hann í viðmerkingunum til fyrispurningin.

Hann sigur seg undrast á, at øll landsstýrisfólkini eru so nógv burturstødd í ørindum uttanlands.

Kundi peningurin verið brúktur betur?

Løgtingsmaðurin spyr eisini løgmann beinleiðis, um hesir pengarnir og henda arbeiðsorkan ikki kundu verið raðfest betur.

– Undirritaði loyvir sær at ivast í, um pengarnir og arbeiðsorkan er brúkt á skynsaman hátt, tá ið so nógva tíð verður brúkt í útlondum, skrivar Steffan Klein Poulsen.

Hann vil harumframt hava løgmann at svara, um sama ferðavirksemi kann væntast komandi tíðina.

Seinasti spurningurin er, um løgmaður heldur, at landsstýrisfólk, sum fyrst og fremst umsita innlendismál, røkja áhugamál føroyinga best við at vera í Føroyum ella við at ferðast uttanlands.