Hvat skalt tú gera, um ein av vinunum fær skaða? Tað kann vera trupult at vita, tá ið tú ert lítil. Men við fyrstuhjálparsanginum hjá Jensinu fáa børnini eina syngjandi vegleiðing til, hvussu tey geva fyrstuhjálp - stig fyri stig.
Øll kunnu gera mun, tá ið óhapp henda. Eisini børn. Treytin er tó, at tey vita, hvussu tey skulu bera seg at. Júst tað er endamálið við Fyrstuhjálparsanginum.
Uttanlands vísa kanningar nevniliga, at smá børn ofta renna burtur ella krógva seg, tá ið óhapp henda. Við hesum skulu tey fáa vitan um, hvussu tey eiga at bera seg at.
Fyrst og fremst snýr fyrstahjálp fyri børn seg um at vera ein góður vinur. Tey skulu læra at skapa tryggleika, so at tey sjálv og onnur ikki eisini fáa skaða. Síðani skulu tey rópa um hjálp og fáa onkran vaksnan at koma. At enda skulu tey duga at hjálpa eftir førimuni.
Til allar vanligar smáskaðar hjá børnum - sama um onkur hevur brent seg, skurslað seg, bløðir, hevur keikt ein lið ella smekkað seg í - hjálpir tað væl at leggja ein vátan, kaldan lappa á sum fyrstu hjálpina. Tað er eitt greitt og ítøkiligt ráð, sum sjálvt smá børn megna at gera. Hevur tann skaddi mist vitið, brotið okkurt ella bløðir sera illa, skulu tey tó eisini duga at ringja 1-1-2 og fáa ein sjúkrabil at koma at hjálpa.
Alt hetta syngja vit saman við Jensinu Olsen í Fyrstuhjálparsanginum. Við at gera stigini í fyrstuhjálp til ein sang, er sannlíkt, at børnini betur fara at minnast, hvussu tey skulu bera seg at, tá ið okkurt hendir.
Stigini eru:
1: Skapa tryggleika fyri teg sjálva/n og onnur
2: Met um tann skadda
3: Rópa um hjálp ella ring 112
4: Gev fyrstuhjálp.
Men mest av øllum: ver ein góður vinur. Ugga, troysta - og ikki rýma.
Hetta er eitt gott høvi hjá foreldrum, pedagognum, lærarum og vaksnum annars at tosa við børn um óhapp og skaðar - og at vísa á, at børn saktans kunnu gera góðan mun.
Tað er Betri Trygging, sum hevur latið sangin gera sum ein part av barnauniversinum, ið júst snýr seg um børn, fyrstuhjálp og tryggleika.
Orð: Eydna Skaale í samráð við Reyða Kross Føroya
Lag: Jensina Olsen
Tónleikarar: Jensina Olsen, Johannes Hellbo Olsen og Bjarni Jøkladal
Lagt til rættis: Jensina Olsen og Johannes Hellbo Olsen
Ljóðbland og framleiðsla: Johannes Hellbo Olsen
Framleiðslustjóri: Eydna Skaale
Myndir: Erla Rajani Ziskasen
Útgáva: Tutl
Lurta eftir Fyrstuhjálparsanginum
Jensina (Tita og Treysti)
Fyrstuhjálparsangurin
Útgivið 30. September 2026 av Plátufelagnum Tutl
