Tórshavnar kommuna handaði í dag M. A. Jacobsens virðislønir 2026. Virðislønir vórðu latnar fyri fagrar bókmentir, yrkisbókmentir, barnamentan og annað mentanaravrik.
Danny Danielsen, pápi Trygva, tekur ímóti virðislønini hansara vegna
Trygvi Danielsen fekk virðislønina fyri fagrar bókmentir fyri skaldsøguna „hey :) tað metamodernistiska dómadagsmanifestið anno domini MMXXV et in futurum“.
Í grundgevingini verður bókin lýst sum ein dystopisk søga um einsemi og ráðaloysi hjá ungum dreingi, sum situr í einum kjallara framman fyri telduna dag og nátt. Teksturin er settur upp sum kjattboð, og bókin viðger millum annað talgild sambond og vreiði hjá ungum dreingjum, sum hava ilt við at finna sítt pláss í samfelagnum.
Dómsnevndin heldur, at bókin er listaliga væl hugsað og gjørd og „rakar beint inn í samtíðina“.
Avroðini fáa hægri tign
Virðislønina fyri yrkisbókmentir fingu Annika Kunoy Im og Tóra Effersøe Mortensen fyri bókina „Tað, sum eftir er – smakkir úr og søgur um avroð“.
Bókin viðger føroyska matmentan og avroð, og sambært grundgevingini fáa avroðini, sum í dag ofta verða lítilsmett, hægri tign í bókini.
Søgurnar snúgva seg millum annað um samanhald, burðardygd og føroyskar siðvenjur. Bókin sameinir tekst, myndir og uppskriftir og skal geva lesaranum íblástur til at gagnnýta tilfeingi, sum annars í stóran mun endar sum burturkast.
Dómsnevndin heldur, at bókin bæði ríkar siðbundnu føroysku mentanina og letur eyguni upp fyri tí ríkidømi, sum longu er rundan um okkum.
Elsa Berg, borgarstjóri, handaði Urd Johannesen virðislønina
Ferð til Kongurvág gav virðisløn
Urd Johannesen fekk M.A. Jacobsens virðisløn fyri barnamentan fyri bókina „Ferðin til Kongurvág“.
Bókin snýr seg um Ólav, sum er upptikin av Minecraft, men sum samstundis stríðist við ótta og marru.
Í talgilda heiminum hevur hann tamarhald á støðuni, men í sínum egna innara heimi er støðan ein onnur. Tá ein eiturkoppur byrjar at tosa, verður latið upp fyri einum hugflogsríkum heimi, har Ólavur verður noyddur at standa ímóti tí, sum ræðir hann.
Dómsnevndin sigur, at bókin flættar Minecraft, hugflog og barnsins innara lív saman og vísir, at dirvi ikki merkir at vera uttan ótta, men at halda fram hóast óttan.
Silja Eystberg hevur myndprýtt bókina.
Elsa Berg, borgarstjóri, handaði Suna Merkisstein virðislønina
Suni Merkistein heiðraður fyri mentanaravrik
Virðislønina fyri annað mentanaravrik fekk Suni Merkistein fyri sínar mongu mentanarsendingar og frásagnir í Kringvarpi Føroya.
Í grundgevingini verður arbeiðið hjá honum lýst sum týðandi og virðismikil dokumentarisma við stórum samfelagsligum virði.
Sendingarnar hjá Suna Merkistein hava varpað ljós á søguligar, mentanarligar og listaligar varðar í føroyska samfelagnum og eru við til at varðveita mál, mentan, siðaarv og føroyskan samleika.
Myndir: Virðislønir M.A. Jacobsens 2026
Eisini málið og frásagnarkynstrið verða drigin fram.
– Við síni eyðkendu rødd, stóra orðfeingi og dárandi kynstri at siga søgur hevur Suni Merkistein í áratíggju rúnabundið og ríkað føroyingar, stendur í grundgevingini.
M. A. Jacobsens virðislønirnar eru 75.000 krónur hvør.
