Amnesty International Føroyar heitir á Løgtingið um ikki at samtykkja fleiri av broytingunum, sum eru skotnar upp í nýggju fosturtøkulógini.

Lógin kom í gildi 1. juli í ár. Broytingaruppskotið varð lagt fram av Steffani Klein Poulsen 10. september og hevði fyrstu viðgerð í Løgtinginum 24. september. Málið er nú í Rættarnevndini.

Amnesty heldur, at galdandi lóg var eitt stórt framstig fyri rættindini hjá kvinnum og gentum, og at fleiri av broytingunum nú fara øvugtan veg.

– Verða broytingarnar samtyktar, er talan um eitt greitt afturstig fyri rættindini hjá gentum og kvinnum, skrivar Amnesty Føroyar.

Ímóti kravdari bíðitíð

Eitt av uppskotunum, sum Amnesty serliga finst at, er krav um ráðgeving bæði undan og eftir fosturtøku.

Harumframt verður skotið upp, at fimm dagar skulu ganga frá ráðgevingini, til fosturtøkan í fyrsta lagi kann fremjast.

Amnesty tekur undir við, at kvinnur skulu hava atgongd til haldgóða, heilsufakliga og óhefta ráðgeving, men heldur, at ráðgevingin skal vera eitt tilboð og ikki eitt krav.

Felagsskapurin heldur heldur ikki, at heilsufaklig grundgeving er fyri kravdari umhugsunartíð.

– Í heila tikið er krav um umhugsunartíð og ráðgeving ein vanvirðing av førleikunum at taka egnar avgerðir og ger seg inn á sjálvavgerðarrættin hjá teimum, ið eru upp á vegin, skrivar Amnesty.

Vil ikki hava krav um foreldraloyvi

Amnesty mótmælir eisini uppskotinum um, at ung undir 18 ár sum meginregla skulu hava loyvi frá foreldrunum til at fáa fosturtøku.

Felagsskapurin vísir á, at kynsligi lógaldurin í Føroyum er 15 ár og spyr, hví rætturin at taka avgerð um viðgongu ikki skal fylgja sama aldursmarki.

Amnesty heldur, at ung skulu hava góðan stuðul og ráðgeving og kunnu hava tørv á foreldrum ella verjum í sambandi við avgerðina. Men felagsskapurin heldur ikki, at samtykki frá foreldrum eigur at vera eitt krav.

Avleiðingin kann sambært Amnesty vera, at ein genta, sum ikki vil fullføra eina viðgongu, verður noydd at gera tað, tí foreldrini nokta henni at fáa fosturtøku.

Finst eisini at broytingum eftir 12. viku

Triðja høvuðsatfinningin snýr seg um møguleikan at fáa fosturtøku eftir 12. viku.

Amnesty vísir á, at uppskotið millum annað strikar møguleikan at fáa fosturtøku eftir 12. viku við atliti at álvarsamari sálarligari sjúku hjá barninum.

Harumframt verður sambært Amnesty møguleikin í bráðfeingis støðum at loyva fosturtøku eftir 12. viku uttan loyvi frá samráðnum smalkaður, so vandi fyri likamligu og sálarligu heilsuni hjá kvinnuni ikki longur í sama mun er grundarlag fyri fosturtøku.

Amnesty heldur, at hetta kann seta heilsuna hjá kvinnum í vanda.

– Vísið álit, setið ikki forðingar

Boðskapurin hjá Amnesty til politikararnar er, at sjálvsavgerðarrætturin hjá kvinnum og gentum eigur at standa í miðdeplinum.

Um politiska ynskið er at fáa talið av fosturtøkum niður, heldur Amnesty, at onnur amboð eiga at verða brúkt.

Felagsskapurin mælir heldur til betri seksualupplýsing og lætta atgongd til góða fyribyrging enn at seta fleiri forðingar fyri kvinnur, sum ynskja fosturtøku.

Amnesty heitir samstundis á limir og onnur um at seta seg í samband við løgtingsfólk og gera vart við teirra mótstøðu móti uppskotinum.