Fleiri býir í Norðurfraklandi seta í dag útgonguforboð í gildi eftir mótmælini um vikuskiftið. Tað skriva tíðindastovurnar Reuters og AFP.
Sambært skrivstovuni hjá franska forsætisráðharranum, Sébastien Lecornu, verður forboðið galdandi mánakvøldið og týskvøldið frá klokkan 20 til klokkan seks morgunin eftir, skrivar AFP.
Reuters upplýsir, at talan er um býirnar Lille, Douai, Wattignies og Denain.
Fyrr mánadagin segði Lecornu sambært BBC, at útgonguforboð kundu koma upp á tal eftir mótmælini um vikuskiftið. Hann legði dent á, at forboðini skuldu vera avmarkað og galda í ávísum økjum.
Endamálið er at verja bæði fyritøkur og fólk, segði forsætisráðharrin.
Fleiri hundrað túsund fólk vóru á gøtunum um vikuskiftið, og fráboðanir vóru um bæði herverk og rán úr handlum.
Bara í París vóru millum 300 og 400 handlar fyri herverki, upplýsir handilskamarið í París. Sambært franska handilskamarinum vórðu 2.000 handlar kring landið ávirkaðir av ófriðinum, skrivar Reuters.
Í Marseille, sum er ein av býunum, ið vórðu harðast raktir, er longu sett forboð fyri almennum samkomum millum klokkan 12 og 20.
Franski innanríkisráðharrin, Laurent Nunez, viðgekk mánadagin, at løgreglan misti tamarhaldið í fleiri fronskum býum undir mótmælunum um vikuskiftið.
Sambært ráðharranum vórðu fleiri enn 2.000 fólk handtikin kring Frakland, og 600 løgreglufólk fingu skaða.
Mótmælini byrjaðu sum ein mótmælisrørsla móti umstøðunum í fronsku skúlunum. Síðani hava tey ment seg til breiðari mótmæli móti millum annað høgu livikostnaðunum.
Ritzau
