Felagið fyri Lesi- og Skriviveik vil hava játtanina á fíggjarlógini hækkaða úr 2,75 milliónum upp í 3,5 milliónir krónur.

Felagið vísir á, at tørvurin á hjálp er stórur, og at tað áhaldandi fær áheitanir frá foreldrum at børnum, sum ikki fáa neyðugu hjálpina í fólkaskúlanum.

Tað stendur í einum skrivi til landsstýrismannin í mentamálum, Bárð á Lakjuni, sum eisini er sent fíggjarnevnd Løgtingsins.

Høvuðsbólkurin hjá Lesihúsinum er í dag børn úr triðja flokki og upp í tíggjunda flokk.

Men tað eru eisini lærlingar, lesandi og vaksin uttan skúlatilknýti, sum venda sær til felagið við lesi- og skrivitrupulleikum.

Lesihúsið er flutt í størri høli, sum sambært felagnum hóska nógv betur til virksemið. Harvið eru umstøður til at víðka hjálpina, so fleiri kunnu fáa gagn av henni.

Felagið hevur eisini gjørt avtalu við Nám, so vaksin uttan skúlatilknýti fáa atgongd til tøkniligu hjálparamboðini, sum Nám bjóðar.

Hetta skal hjálpa fólki, sum annars hava fáar møguleikar at fáa stuðul til lesi- og skriviveikleikar.

Í skrivinum verður upplýst, at níggju orðblindalærarar eru knýttir at virkseminum. Harumframt eru leiðari, telduvørður og fíggjarleiðari umframt vaski- og køksfólk.

Øll eru tímalønt sambært lønarskipanini fyri frítíðarundirvísing.

Felagið fyri Lesi- og Skriviveik varð stovnað fyri 25 árum síðani.

Nú heitir felagið á landsstýrismannin og fíggjarnevndina um at hækka játtanina við 750.000 krónum, so tað kann hjálpa fleiri.