Klokkan 9.45 í dag verður fíggjarlógaruppskotið fyri 2027 lagt fyri Løgtingið. Hetta er fyrsta fíggjarlógaruppskotið hjá nýggja landsstýrinum.

Klokkan 10 verður framløga í Smæruni, har Aksel V. Johannesen, landsstýrismaður í fíggjarmálum, leggur uppskotið fram fyri tíðindafólki og øðrum áhugaðum.

Løgmaður hevur lovað, at yvirskot skal vera á fíggjarlógini. Tí er stórur spenningur um bæði tølini á botnlinjuni og tær raðfestingar, sum skulu tryggja lovaða yvirskotið.

Áhugin snýr seg eisini um, hvussu landsstýrið ætlar at tryggja haldføri í búskapinum framyvir, og hvørjar nýskipanir fara at síggjast aftur í uppskotinum.

Greitt er til dømis, at landsstýrið ikki ætlar at hækka pensjónsaldurin skjótari enn longu ætlað, soleiðis sum Búskaparmálaráðið hevur víst á sum ein møguleika. Landsstýrið ætlar at halda seg til lógina frá 2018.

Tí verður áhugavert at síggja, hvørji onnur tiltøk landsstýrið leggur upp til fyri at styrkja almenna búskapin.

Ein sparing er longu komin undan kavi. Mentamálaráðið ætlar at spara tríggjar milliónir krónur við at leggja Nám og Undirvísingarstýrið saman.

Við framløguni í dag verður greitt, um fleiri slíkar samanleggingar eru á veg, og hvørjar aðrar sparingar og broytingar landsstýrið ætlar at fremja.

Eftir framløguna skal Løgtingið viðgera uppskotið, áðrenn fíggjarlógin fyri næsta ár verður endaliga samtykt – og av royndum vita vit, at tá kann nógv broytast í mun til tað uppskotið, sum landsstýrismaðurin í fíggjarálum hevur lagt fram.