Norðurkoreanski leiðarin, Kim Jong-un, vigar umleið 140 kilo og er sera ov feitur.
Tað metir ein suðurkoreansk fregnartænasta, sum hevur kannað heilsustøðuna hjá honum úr frástøðu, skrivar tíðindastovan AFP.
Suðurkoreanski tingmaðurin Youn Kun-young legði upplýsingarnar fram mikudagin.
Sambært fregnartænastuni er 42 ára gamli Kim Jong-un í stórum vanda fyri at fáa hjarta- og æðrasjúkur. Umframt ovurvektina verður víst á, at hann roykir illa.
Tænastan leggur tó dent á, at eingin tekin eru um, at hann hevur heilsutrupulleikar í løtuni.
Óvissa um hæddina
Fregnartænastan upplýsir ikki, hvussu høgur Kim Jong-un er. Almennar keldur í Norðurkorea hava áður sagt hann vera 171 sentimetrar, meðan aðrar keldur meta hæddina at vera millum 165 og 170 sentimetrar.
Er hann 171 sentimetrar høgur og vigar 140 kilo, er BMI-talið umleið 48. Eitt BMI á 30 ella meira verður flokkað sum stór ovurvekt.
Heilsan hjá norðurkoreanska leiðaranum hevur leingi verið undir sjóneykuni hjá umheiminum.
Í 2020 sást hann ikki alment í 20 dagar og var heldur ikki við til eina hátíðarløtu í sambandi við føðingardagin hjá deyða abba sínum.
Fráveran elvdi til leysasøgur um, at hann var álvarsliga sjúkur eftir eina skurðviðgerð. Hann kom tó seinni aftur til sínar uppgávur.
Bæði pápi hansara, Kim Jong-il, og abbin, Kim Il-sung, vóru ov tungir og royktu. Báðir doyðu av blóðtøppi í hjartanum.
Fólkið manglar mat
Kim Jong-un hevur verið ovasti leiðari í Norðurkorea síðani 2011.
Landið er sera afturlatið, men av og á koma upplýsingar fram um livikorini hjá fólkinum. Afturvendandi verður greitt frá fátækradømi og matvørutroti hjá stórum pørtum av íbúgvunum.
Fyrr í ár segði Elizabeth Salmon, sum vegna ST fylgir støðuni í Norðurkorea, at matvørutrot er ein høvuðstrupulleiki í landinum, skrivar AFP.
Kim Jong-un hitti amerikanska forsetan, Donald Trump, í hernaðarfría økinum millum Norður- og Suðurkorea í 2019. Savnsmynd. Mynd: Kevin Lamarque/Reuters
/Ritzau/AFP
