Í farnu viku kundi ein av okkara bestu kokkum, Janus Einar B Sørensen, hátíðarhalda 10 ára dagin fyri samstarvi við Smyril Line-samtakið.
Allastaðni í samtakinum sæst arbeiðið hjá hesum dugnaliga, nærlagda og sera kreativa matlistarmanni.
- Bæði á Munkastovu umborð á Norrønu, Hotel Bandan, Tubbak, Kjøt og aðrastaðni, har hann hevur sett síni fingramerki.
Eygleiðarar vísa á, at Janusi dámar serliga væl at arbeiða við føroyskum rávørum, bæði føroyskum kjøti og føroyskum grønmeti av ymiskum slag.
Komandi vikuskiftið, sum er 23. og 24. oktober, skipa Janus Einar B. Sørensen og tey á Katrinu Christiansen fyri serligum og spennandi kvøldum við rávørum úr føroyska matkovanum.
Tað er hugaligt at síggja, hvussu føroyska heystið alsamt vinnur frama á gastronomiska pallinum, bæði kring landið og í høvuðsstaðnum.
Á Katrinu Christiansen fara tey enn einaferð at fegnast um føroyska lambið, fiskin og ikki minst um fantastisku grøðina heiman av Sandi.
