Klokkan 19.45 í kvøld verður seinni heimadysturin í hesum landsliðsumfarinum. Tað verður tá ið Føroyar fáa vitjan av Slovakia. Fjórði og síðsti dysturin í hesum umfarinum verður týsdagin klokkan 15 í Kasakstan. Ferðalagið fer úr Vágum við rutuflogfari í morgin og so verður farið víðari úr Keypmannahavn við leiguflogfari.

Í Moldova vóru fimm broytingar millum teir fyrstu ellivu, tá ið sammett verður við liðið, sum spældi ímóti Kasakstan. Landsliðsvenjarin hevur sagt, at tað eisini í kvøld vera fleiri broytingar, tá ið sammett verður við liðið, sum spældi í Moldova. Tað kann væl fara at vísa seg, at liðið í kvøld fer at líkjast nógv tí, sum var á vøllinum frá fyrsta bríksli ímóti Kasakstan.

Tað vil siga, at Jóannes K. Danielsen og Martin Agnarsson aftur vera vongverjar, Géza Dávid Turi og Jóannes Bjartalíð vera sentralir miðvallarar, og í framrættaðu plássunum í borðunum vera Áki D. Samuelsen, sum av álvara hevur spælt seg inn í landsliðshitan, og Hanus Sørensen.

Um tað verður Adrian Justinussen ella Petur Knudsen, sum verður fremsti maður, er kanska eitt sindur ivasamt. Tað kann vera, at Jørgen Nielsen, sum í síni tíð á U-21 landsliðnum, tá ið Eyðun Klakstein og Atli Gregersen høvdu ábyrgdina har, fer at eiga onkran leiklut í kvøld. 22 ára gamli víkingurin hevur ikki enn verið á A-landsliðnum. Á U-21 landsliðnum skoraði hann í 11 dystum fimm mál.

Heilt víst er tað, at Andrias Edmundsson og Gunnar Vatnhamar vera miðverjar. Í Moldova var Odmar Færø á beinkinum, og Samuel Johansen Chukwudi var miðverji. Ímóti Kasakstan var Odmar Færø liðformaður, og tá var hann undan dystinum á tíðindafundinum saman við venjaranum. Í gjár var Gunnar Vatnhamar á tíðindafundinum saman við Eyðuni Klakstein. Hann var síðstu løtuna í Moldova liðformaður, eftir at Viljormur Davidsen var farin av vøllinum. Um Samuel Johansen Chukwudi í kvøld verður í miðverjuni, og bæði Odmar Færø og Viljormur Davidsen vera á beinkinum, so verður Gunnar Vatnhamar aftur í kvøld liðformaður.