Skotska stjórnin hevur váttað, at 23 milliónir pund eru settar av til at fyrireika tunnilsætlanina millum hetlendska meginlandið og oynna Yell.
Tað skrivar Shetland News.
Stjórnin hevur nú eisini staðfest, at játtanin er óheft av einari aðrari ætlaðari stuðulsskipan til íløgur í Hetlandi, Orknoyggjum og Suðuroyggjum. Møguligur stuðul úr teirri skipanini kemur sostatt aftrat teimum 23 milliónunum.
Peningurin skal brúkast næstu árini til kanningar og til at útgreina grundarlagið undir einum tunli til Yell.
Hetlendska oyggjaráðið hevur samtykt eina ætlan fyri samferðsluna millum oyggjarnar, har tunnilin til Yell verður raðfestur fremst millum føstu sambondini. Síðan kemur tunnil til Unst.
Sambært ráðgevunum kann ein tunnil undir Yell Sound verða liðugur í 2034 og ein tunnil til Unst í 2036. Hetta byggir tó á, at neyðuga fíggingin fæst til vega. Í tíðarætlanini verður roknað við, at arbeiðið við báðum tunlunum lutvíst fer fram samstundis, men at byrjað verður við Yell.
Tunnilin til Yell kann sambært metingunum kosta meira enn 500 milliónir pund, sum svarar til 4,4 milliardir króur.
Orsøkin til, at Yell verður raðfest fyrst, er millum annað, at sambandið verður mett at gagna flest fólkum. Tað fer at lætta um ferðingina millum meginlandið og oyggjarnar Yell, Unst og Fetlar og kann eisini gagna alivinnuni á Yell og rúmdarstøðini SaxaVord á Unst.
Samtykta ætlanin fevnir eisini um nýggjar ferjur og ábøtur á havnir. Hetlendska oyggjaráðið hevur tó gjørt greitt, at stórur og varandi stuðul uttaneftir verður neyðugur.
Enn er eingin bindandi játtan til sjálva tunnilsbyggingina, og samtyktin hjá oyggjaráðnum bindur tað heldur ikki til at fara undir hana.
