Mike Johnson, formaður í Umboðsmannatinginum í USA, hevur fyrivarni við ætlanini um at senda avrættingina av deyðadømda fyrrverandi hermanninum Nidal Hasan beinleiðis.

Tað sigur leiðandi republikanski politikarin í samrøðu við CBS News mánadagin.

– Stúranin er, at vit skapa eina upptøku, sum kann verða brúkt til at útvega nýggj yvirgangsfólk, sigur hann.

– Vit mugu hugsa væl um politisku avleiðingarnar av øllum hesum.

Nidal Hasan læt 5. november í 2009 skot av á herstøðini Fort Hood í amerikanska statinum Texas. 13 fólk lótu lív, og 32 vórðu særd.

Í 2013 varð Hasan, sum nú er 56 ára gamal, funnin sekur í øllum ákærunum og dømdur til deyða av einum amerikanskum herdómstóli.

Donald Trump, forseti, hevur góðkent, at Hasan verður avrættaður við skjóting á Fort Hood, har hann framdi brotsgerðina.

Í síðstu viku segði amerikanski verjumálaráðharrin, Pete Hegseth, at avrættingin fór at verða send beinleiðis.

– Fólk mugu skilja, at slíkar gerðir hava álvarsligar avleiðingar, segði hann.

Mike Johnson sigur við CBS News, at hann ikki fer at hyggja, um avrættingin verður send beinleiðis.

– Tað eru starvsfelagar, sum eru stúrnir, sigur hann.

Ætlanin hevur elvt til hvassar atfinningar bæði í USA og uttanlands. Fríggjadagin segði republikanski varaforsetin, J. D. Vance, eisini, at hann ikki fór at hyggja at avrættingini.

Sambært tíðindastovuni AFP hevur Trump tó sagt, at avgerð enn ikki er tikin um, hvørt avrættingin skal sendast beinleiðis.

Hasan hevur sitið í koyristóli síðani skottilburðin. Avrættingin verður tann fyrsta hjá amerikanska herinum í fleiri áratíggju.

/ritzau/