Tað segði Knud Simonsen frá Veðurstovu Føroya við Kringvarpið í morgun.

Eitt lágtrýst fer eystur millum Føroyar og Ísland mikudagin og hevur nógvan vind og nógv regn við sær. Sambært Veðurstovuni rakar tað Føroyar sunnaneftir mikumorgunin, og sum dagurin líður, verður ættin útsynningur.

Í nýggjastu forsøgnini, sum varð skrivað klokkan 06.25 í morgun og er galdandi til á middegi mikudagin, verður sagt, at vindurin fyrrapartin í morgin veksur til 13 til 18 metrar um sekundið av sunnan. Tá verður samdrigið og regn.

Knud Simonsen metir, at vindurin veksur enn meira út á dagin. Um middagsleitið verður vindferðin um 20 metrar um sekundið, og seinnapartin kann hon møguliga koma upp í 25 metrar um sekundið.

Lítið lot í stórum parti av landinum í morgun

Í morgun var lítið lot í mesta partinum av landinum. Sunnast var tó meira vindur. Sambært Knudi Simonsen vístu mátararnir á Akrabergi og Porkerishálsi 14 til 18 metrar um sekundið.

Føroyar lógu tá í eyganum á einum lágtrýsti, sum mentist seinnapartin í gjár og flutti seg úr økinum við Skotland móti Føroyum. Sunnanfyri og eystanfyri lágtrýstið var fitt av vindi. Knud Simonsen greiddi frá, at tað hevði verið torført at spáa neyvt um veðrið, tí tað var treytað av, hvussu lágtrýstið rakti landið.

Sum fyrraparturin líður í dag, verður meira vindur av útnyrðingi, og ættin lækkar líðandi niður í vestan. Í kvøld verður vindferðin 10 til 15 metrar um sekundið av vestan, og í nátt verður hon 8 til 13 metrar um sekundið av útsynningi.

Síðan fer vindurin aftur at veksa fyrrapartin í morgin.