Medisinski Depil hevur 16 sergreinar, ið fevna um hjartasjúkur, lungnasjúkur, nýrasjúkur, krabbasjúkur, húðsjúkur v.m. Depilin hevur í dag 25 serlæknar, men tørvurin er 48 serlæknar, um serøkini skulu vera nøktandi mannaði. Medisinski Depil hevur valt at taka avbjóðingina at manna serøkini í álvara og hevur tískil seinastu árini verið í tilgongd at útbúgva serlæknar til serøkini, ið eru undirmannaði.
Hetta arbeiðið fer nú at síggjast aftur. Í komandi ári verða tríggir læknar útbúnir serlæknar, ið hava tikið ein týðandi part av útbúgvingini á Landssjúkrahúsinum. Talan er um serlæknar innan endokrinologi (t.e. diabetes og hormonsjúkur) innan geriatri (t.e. eldrasjúkur) og innan hjartasjúkur.
Hetta eru sjúkuøki, ið hava átrokandi tørv á fleiri serlæknum, tí sjúklingarnir og uppgávurnar eru so nógvar, at tað er trupult fáa endarnar at røkka saman við verandi manning.
Avbjóðingin er tó, at verður eingin peningur tøkur í einari serlæknapulju í komandi ári, so verður ikki møguligt at seta nýggju serlæknarnir innan serøkini, ið hava ein átrokandi tørv. Og so er vandi fyri, at føroyska sjúkrahúsverkið og føroyska samfelagið missa hesar serútbúnu føroyingarnar av hondum til útlandið.
Eitt føroyskt sjúkrahúsverk, ið dúvar uppá útlendskar vikarar, tí tað ikki ber til at seta staðbundnar serlæknar, er eitt sjúkrahúsverk, ið ikki kann hava ein skynsaman rakstur. Fyri at fáa eitt sjúkrahúsverk, ið veruliga hvílir í sær sjálvum, er neyðugt at tryggja, at staðbundna manningin er í lagi.
Tað krevur eitt áhaldandi arbeiði – har ikki ber til at steðga á. Og tað krevur áhaldandi íløgur í útbúgving og størv í føroyska sjúkrahúsverkinum heldur enn at skorið verður so nógv inn á bein, at ikki ber til at gera neyðugu framstigini, ið mugu gerast fyri at fylgja við.
Føroyska samfelagið má geva føroyska sjúkrahúsverkinum hægstu raðfesting, um vit ynskja at Sjúkrahúsverkið skal vera á hædd við sjúkrahúsverkini í grannalondunum – nakað, ið vit eiga og mugu stremba móti.
Jan Rasmussen
Leiðandi yvirlækni, PhD
Medisinski Depil
Landssjúkrahúsið
