Ein maður læt lív, og eini níggju fólk eru endað í leivdunum, tá eitt hotell smokkaði saman í Argentina í dag.
Tað veit tíðindastovan CNN at siga.
Sagt verður, at hotellið liggur í strandarbýnum, Villa Gesell, nakrar hundrað kilometrar úr høvuðsstaðnum, Buenos Aires.
CNN sigur, at bjargingarfólk hava arbeitt við at loysa eini níggju fólk úr leivdunum av hotellinum.
- Sløkkiliðsfólk, løgregla og sjúkraflutningsfólk eru til hjálpar í økinum við hotellið, leggur CNN aftrat.
Sagt verður, at hotellið, sum smokkaði í argentinska býnum, var 10 hæddir, og fleiri fólk eru saknað í leivdunum.
