Tvey svar frá landsstýrisfólkum vísa ymiskar støður til spurningin um aldursmark á orkudrykkjum.
Fríggjadagin skrivaði in.fo, at Eyðdis Hartmann Niclasen, landsstýriskvinna í heilsu- og orkumálum, vil taka málið upp við landsstýrismannin í vinnumálum. Hon heldur ikki, at børn og ung yngri enn 18 ár eiga at kunna keypa orkudrykkir.
Men í einum svari til Steffan Klein Poulsen, løgtingsmann, er boðskapurin frá Jacobi Vestergaard greiður:
– Landsstýrið hevur ikki ætlanir um at áseta aldursmark fyri orkudrykkir.
Svarið er dagfest 10. oktober, dagin eftir svarið hjá Eyðdis Hartmann Niclasen.
Forboð eigur ikki at vera fyrsta loysnin
Steffan Klein Poulsen hevur í einum § 52a fyrispurningi spurt, um landsstýrismaðurin ætlar at seta aldursmark á orkudrykkir. Um ikki, bað hann um eina grundgeving.
Jacob Vestergaard vísir í svarinum á, at vit sum heild eiga at vera afturhaldin við at seta forboð. Eitt forboð eigur eftir hansara tykki ikki at vera fyrsta loysnin, um onnur og minni víðfevnd stig kunnu takast.
Hann heldur, at tað er gott, at brúkarar verða kunnaðir um vandarnar við nýtslu av orkudrykkjum, serliga millum børn og ung.
Landsstýrismaðurin vísir eisini á, at viðkomandi myndugleikar hava varpað ljós á økið, og at partar av handilsvinnuni sjálvir hava ásett aldursmark fyri keyp av orkudrykkjum.
Eyðdis vil kanna 18 ára aldursmark
Sum in.fo skrivaði 9. oktober, hevur Eyðdis Hartmann Niclasen svarað einum fyrispurningi frá Fíu Selmu Nielsen um sama evni.
Í tí svarinum segði hon, at hon ætlar at samskifta við landsstýrismannin í vinnumálum um átøk, sum kunnu verja børn og ung. Hon nevndi millum annað 18 ára aldursmark, ávaringartekstir og kunnandi átøk.
Hon vísti eisini á, at bæði Heilsustýrið og Heilsufrøðiliga starvsstovan mæla børnum frá at drekka orkudrykkir.
Meðan landsstýriskvinnan í heilsumálum sostatt vil kanna møguleikan fyri einum aldursmarki, sigur landsstýrismaðurin í vinnumálum nú, at landsstýrið ikki hevur slíkar ætlanir.
