Løgreglan fekk mánamorgunin fráboðan um, at innbrot hevði verið í Á-handlinum á Landavegnum.

Innbrotið er eftir øllum at døma hent millum klokkan 23.21 sunnukvøldið og klokkan 5.00 mánamorgunin. Talan er sostatt um eitt tíðarskeið upp á góðar fimm og ein hálvan tíma.

Tjóvurin ella tjóvarnir hava brotið ein rút og soleiðis fingið atgongd til skrivstovuhøli í bygninginum.

Inni í bygninginum er eitt pengaskáp brotið upp, og ein størri kontant peningaupphædd er tikin úr skápinum.

Løgreglan vil í løtuni ikki upplýsa, hvussu stór upphæddin er.

Vakmyndatól eru á staðnum, og løgreglan er í ferð við at kanna upptøkurnar sum part av kanningararbeiðinum.

Samstundis verður heitt á fólk, sum hava sæð ella hoyrt okkurt óvanligt á Landavegnum í økinum kring handilin hetta tíðarskeiðið, um at seta seg í samband við løgregluna.

– Vit leita eftir vitnum, sum kunnu hava sæð aktivitet í økinum millum klokkan 23.21 og 5.00. Eisini um onkur hevur hoyrt ein rút brotna, eru vit áhugað í at frætta frá teimum, sigur løgreglan.

Enn er eingin tikin fyri innbrotið, og løgreglan arbeiðir nú við at fáa málið uppklárað.