Orkudrykkir eru ein fastur partur av gerandisdegnum hjá nógvum ungum í Norðurlondum. Seks av tíggju drekka teir minst eina ferð um vikuna, og nærum helvtin sigur, at tey í minsta lagi viðhvørt ikki klára seg ígjøgnum dagin uttan.
Tað skrivar Norðurlendska ráðharraráðið um eina kanning millum 4.916 ung í aldrinum 15 til 19 ár í Danmark, Svøríki, Noregi, Finnlandi og Íslandi.
30 prosent siga seg hava upplivað eitt nú hjartabankan, svøvntrupulleikar og svimbul í sambandi við orkudrykkir. Triði hvør vil minka um nýtsluna.
Smakkurin er vanligasta orsøkin til at drekka orkudrykkir. Onnur drekka teir fyri at fáa meira orku ella halda sær vaknum.
Nýtslan er størst í Svøríki, har 75 prosent drekka orkudrykkir hvørja viku. Í Danmark er talið 43 prosent.
Karen Ellemann, aðalskrivari í Norðurlendska ráðharraráðnum, metir úrslitini vera eitt ávaringartekin.
Svenska matvørustýrið hevur staðið fyri kanningini. Næsta stig er at taka ung við í arbeiðið at finna tiltøk, sum kunnu minka um nýtsluna.
