Gianni Infantino hevur boðað teimum 211 limalondunum í Fifa frá, at ætlanin, sum nevndist Fifa Forward Enterprise, FFE, nú endaliga er slept.

Ætlanin snúði seg um at fáa íløgufólk inn í vinnuliga partin av HM og øðrum kappingum hjá Fifa. Hon elvdi til nógva mótstøðu og atfinningar móti Infantino.

Í einum brævi til limalondini, sum Reuters, AFP og The Athletic hava sæð, sigur Infantino nú, at hann ynskir eitt breitt orðaskifti um, hvussu Fifa verður stýrt.

Hann ætlar at biðja Fifa Council, leiðandi ráðið í felagsskapinum, taka støðu til, um ein óheft uttanhýsis kanning skal gerast av verandi leiðslu- og avgerðarskipanini hjá Fifa. Endamálið skal vera at kanna, um mannagongdirnar kunnu betrast, tá stórar strategiskar avgerðir verða tiknar.

Infantino skjýtur eisini upp, at limalondini og aðrir viðkomandi partar verða tikin við í eitt skipað orðaskifti um framtíðar avgerðargongdina.

– Demokratisku mannagongdirnar, sjálvstøðan og ítróttarliga valdið hjá Fifa vóru ongantíð til sølu. Tey eru ikki til sølu og verða tað ongantíð, skrivar Infantino.

Viðurkennir, at Fifa fór skeivt fram

Infantino viðurkennir samstundis, at Fifa handfór ætlanina um Fifa Forward Enterprise illa.

Sambært honum skuldi ætlanin ikki verið komin alment fram so tíðliga, áðrenn arbeiðið var liðugt og limalondini høvdu fingið hana lagda fyri seg í síni heild.

– Eg viðurkenni, at tá allur samanhangurin ikki var kendur, skapti hetta stúran og gav ta fatan, at avgerðir longu vóru tiknar. Tað vóru tær ikki, skrivar hann.

Hann staðfestir, at uppskotið nú er tikið aftur og ikki verður framt.

Fifa ætlar tó framvegis at økja inntøkurnar, so meira peningur kann verða settur aftur í fótbóltin. Sambært Infantino skal felagsskapurin nú finna aðrar leiðir at útvega peningin.

– Tað, sum broytist, er ikki ambitiónin, men styrkin í tilgongdini, har stór hugskot verða ment, roynd og avgjørd, skrivar Fifa-forsetin.